Terwyl ek so na die prent en woorde kyk voel ek skielik sommer hartseer toe ek die volgende lees "He will give you the freedom of expression and let you fly in the development of your own talents".

Hoeveel mense bereik ooit hulle volle potensiaal? As God so neerkyk oor elkeen van ons, WAT moet HY dink van ons huidige lewe en hoe dinge tans rondom ons is en Hy dit vergelyk met die potensiaal wat HY WEET in ons is?

Al is ek doof het ek al baie meer vermag en strewe ek na baie meer as meeste normale mense op baie gebiede maar tog is daar baie dinge waar ek baie beslis nie my volle potensiaal nastrewe nie. So byvoorbeeld is ek nie geldgierig nie tog stel geld mens in staat om met baie minder stres deur die lewe te gaan en nog meer vir ander te kan beteken (ek smile altyd as ek dink aan "Geld maak mens dalk nie gelukkig nie, maar dit stel jou in staat om in gerief ongelukkig te wees" hehe)

Die rede vir hierdie skrywe is egter vanuit ander perspektief, hierdie prent en woorde daarop.

'n Verhouding, liefde, 'n beminde in jou lewe, is een van die kragtigste en waardevolste aansporingsmiddele wat daar is om die beste uit jouself te haal, om jou volle potensiaal as mens, man, vrou, ouer of geliefde te bereik, al dan nie ter wille van jouself nie, dan ter wille van die wat jy liefhet. Trouens, selfs met net God in jou lewe behoort 'n mens al klaar na jou volle potensiaal te strewe want staan daar nie geskrewe mens mag nie jou talente onder 'n maatemmer wegsteek nie?

Tog, so hartseer en in werklikheid, is dit meestal 'n geval van, nie net in giftige verhoudings nie, maar selfs redelik goeie verhoudings, dat die twee mense nie net nie hulle eie volle potensiaal nie najaag nie, maar ook nie die ander een aanmoedig om sy/haar volle potensiaal te bereik nie en trouens in meeste gevalle eintlik daarteen werk, die ander een nie die ruimte gun om sy/haar eie talente te ontwikkel en volle potensiaal te bereik nie.

Volle potensiaal gaan nie net oor talente nie, dit gaan ook oor jou geluk, menswees, vrouwees, jou geestelike sowel as emosionele lewe en alles rondom jou.

So byvoorbeeld is mans oor die algemeen siende blind vir vrouens se seksuele behoeftes, vir hulle emosionele behoeftes, vertroeteling, aandag, begrip, dinge wat vir 'n vrou belangrik is. Hulle fokus op hulself en in plaas van die volle potensiaal van die begrip vir en bevrediging van mekaar se behoeftes na te streef, "aanvaar" vrouens dit net so en word sodanige potensiaal van 'n veel, veel gelukkiger en bevredigender verhouding weggegooi en onder 'n maatemmer begrawe.

In die meeste gevalle is beide ook so vasgevang in daaglikse roetine, in werk en of besig bly dat werklike talente en/of drome begrawe en onderdruk word en dit word weerspieel in "navorsing" wat wys dat die oorgrote meerderheid mense hulself NIE besig hou (soos werk) met dit wat hulle regtig nog altyd graag wou doen nie.

Op sigself is daar nie soseer iets daarmee verkeerd nie maar my siening is dat, deur mekaar aan te moedig en na die beste van mekaar se vermoe te ondersteun om talente of drome na te streef, elkeen nie net gelukiger sal wees nie, maar dit ook die verhouding en onderlinge begrip tussen mekaar soveel meer sal verbeter en versterk. Elkeen van ons het drome en dit beteken soveel MEER as daar iemand is wat dit saam met ons droom en saam met ons nastreef.

Wat was jou drome en planne vir jou kinders toe hulle nog babas was en wat het daarvan geword? Wat was jou drome en toekomsplanne saam met jou geliefde op julle troudag, om die beste van jouself vir hom/haar te gee en wat het daarvan geword? Verswelg en begrawe onder die druk van die lewe, dag tot dag bestaan en veral die gebrek aan wedersydse aanmoediging om dit sterk en lewendig te hou.

Op die ou end gaan ware liefde, liefde soos wat God vir ons het, daaroor om die beste van jouself te gee en die beste vir die een wat jy liefhet te wil hê met jou hart, siel, gees en liggaam want sekerlik is dit nie genoeg om God of jou geliefde met een hand te dien nie, met een oor te luister nie, net finansieel te versorg en die res van sy/haar behoeftes nie eens te kan insien en verstaan nie, om nie eens van te bevredig te praat nie.

Alleen is dit nie altyd so maklik nie maar is dit dan nie JUIS hoekom God 'n vrou vir die man gemaak het nie, sodat hulle twee saam een kan wees en mekaar aanvul en die beste uit homself, haarself en altwee saam kan haal. DIT is dan ook die grootste gawe en genade van liefde, dan jy nie meer alleen is nie, maar dit twee harte is wat saam soos een klop en liefhet.

Verhoudings Kategorie