Ons almal ken die gesegde "Dit is die klein jakkalsies wat die wingerd verniel" maar hoeveel van ons dink regtig daaroor?

Dit is ook die klein jakkalsies, die klein dingetjies, wat amper ALLES in ons lewe beinvloed en 'n mens kan baie leer deur daarna op te let want 'n mens sowel as ander se werklike gevoel word sigbaar deur die klein dingetjies.

Om 'n kind te bederf met speelgoed en hom/haar altyd sy/haar sin te gee se niks en is meestal eintlik 'n jakkalsie wat die kind se persoonlikheid verniel want dit maak van hom/haar 'n bedorwe brokkie in plaas van 'n goed gebalanseerde kind en later volwassene wat in staat sal wees om die uitdagings van die lewe te trotseer.

Om 'n mens blind te staar teen mooi woordjies of beloftes wat niks beteken nie omdat die DAAD, die klein dingetjies daaragter, ontbreek, is dwaas want dit vernietig nie net 'n mens se persoonlikheid en menswees nie, maar ook die ander persoon want dit dien as aanmoediging om aan te hou met die valsheid.

Daar is so baie klein dingetjies dat mens dit amper nie eens werklik kan beskryf of opsom nie maar daarin le ook juis die probleem want dit is so klein en so baie, dat dit maklik is om te ignoreer tot dit te laat is en die wingerd vernietig is.

Die klein dingetjies le in wat mens dink, se en doen.

Dit le in hoeveel mens aan iemand dink of nie en wat, in hoeveel jy omgee vir iemand of nie, in hoeveel jy jou gevoel en liefde bewys deur daardie klein dingetjies wat op die ou end die getuigskrif is van nie net jou gevoel nie, maar ook jou lewe want deur ons dade en veral die KLEIN daadjies en dinge, skryf ons ons lewensboek.

Meer as 20 jaar gelede het my oorlede ma vir my gesê as mens die kleine (sente) nie eer nie, is jy die grote nie werd nie en dieselfde geld vir nie net finansies nie maar ook mens se lewe waar dit die klein dingetjies is wat op die ou end bepaal wie en wat jy is. (Dit het my terloops tot nou gekos om die waarheid van my ma se woorde (sover dit finansies aangaan) te leer.)

Om 'n verhouding, 'n huwelik, te kan beoordeel moet mens na die klein dingetjies kyk, die alledaagse, want groot dinge is 'n nuwe hoofstuk maar die klein dingetjies is die ink waarmee alles geskryf word en lieg nooit.

M Ô R E

My naam is môre, en moontlik nog steeds binne jou bereik
Net soos die môre's voor my, wat reeds in vergetelheid wegsink.
Nou is ek nog die "môre", maagdelik skoon en onaangeraak,
maar aanstons word ek "vandag", joune, om te bou, maak of breek.
Bitter kort dan word ek die "gister" en dra tot in ewigheid,
die merke van jou doen en late oor die volle tydsbestek.

Eendag sal ook ek ontmoet, al die gisters van jou lewenpad,
dan sal ook ons kan weet, wie en wat jy werklik is en was.
Ongevraag sal dit dan ons onverdiende lot moet wees,
om teen jou te getuig, of dalk namens jou te pleit.
Voor die regstoel van die allerhoogste, eendag, dalk vandag,
want wegvlug kan ons nie, onmoontlik, want die vandag en gister’s,
alles saam is JY.

Kry dus aan jou kant, al my broers en susters wat op jou wag.
Want weldra sal ook ek die laaste een ontmoet,
in wie ek ‘n hegte bondgenoodskap sal kan vind,
of 'n bittere opponent.

Ag hoe bid en pleit ek nie, dat tog ek ook mooi en goed sal wees.
Want ongelooflik soos dit klink, is dit vir ewig neergeskryf,
dat God's genade bly tot die laaste dag,
wat moontlik tog net ek mag wees.

Verhoudings Kategorie