Soos per aangehegte prent is die wysheid om te weet wat nie kan verander nie en wat verander kan word nie maklik nie maar tog is daar ook baie dinge wat as "pointers" vir ons kan dien.

In die eerste plek kan ons nie DIE VERLEDE verander nie en sal geen trane, hartseer, ongelukkigheid, geld, tyd, energie of wat ons ookal op die verlede spandeer dit ooit kan verander nie so dit is nutteloos om enigiets aan of op die verlede te spandeer.

In die tweede plek kan ons nie ONVERANDERBARE DINGE in ons lewe verander nie. Ek is doof, ek is 48 jaar oud, ek is blank, ek is geskei, ek het twee kinders en drie kleinkinders en ek het 'n bles of is is 184 cm lank en dit kan ek nooit verander nie.

In die derde plek kan ons nie ANDER MENSE verander nie want verandering kan NET uit daardie mense self kom.

Wat ons egter wel kan verander is ons HEDE EN TOEKOMS, VERANDERBARE DINGE EN ANDER MENSE inspireer, aanmoeding en help om te verander.

Die Bybel se wel ons is tot alles in staat deur Christus wat ons krag gee maar dit beteken nie ons kan dinge doen wat nie eens Christus self sal doen nie en dit is om ons verlede te verander, onveranderbare dinge te verander en mense te verander.

Christus sal nie ons verlede verander nie, want dit is ons verlede wat ons maak wie en wat ons vandag is en mens kan tog nie 'n boom se wortel uithaal en verwag die boom sal nog bly staan nie en baie dinge van ons verlede is onafskeidbaar deel van ons en weereens deel van wie en wat ons is.

Christus sal ook nie mense verander nie want elkeen moet uit sy eie verander en sy eie pad kies en sy eie boek skryf maar deur die Bybel, die liefde, deur jou en my kan ander mense geinspireer, aangemoedig en gehelp word om te verander maar dit is al want nie eens God self kan of sal iemand verander behalwe as dit uit en deur homself is nie. Hy KAN nie, want die hele beginsel van LIEFDE berus op die KEUSE om dit te aanvaar of te verwerp.

Om tot alles in staat te wees deur Christus wat ons krag gee, is om ook volgens die Bybelse leerstelling en SY voorbeeld te handel, nie net deur te glo nie maar ook die daad by die geloof te voeg.

Ons kan nie ons verlede verander nie, maar ons kan ons hede en toekoms verander deur ons keuses en besluite en die daad. Ons kan nie onveranderlike dinge verander nie maar ons kan dit aanvaar en daarop voortbou soos 'n tak wat uit selfs 'n skewe stam boontoe groei in plaas van ook soos die stam skeef groei. Ons kan ook nie mense verander nie, maar ons kan onsself verander, elke deeltjie van ons hede en toekoms verander om as inspirasie, motivering te dien vir ander en die hand van omgee, liefde en hulp uit te steek sodat onsself OOK daardeur kan groei.

Al kom ons ook uit watter omstandighede en al is ons ook deur wat, is die krag en genade van liefde, van ander en van God self altyd, altyd daar om ons te leer en te help om self ook ons hede en toekoms dienooreenkomstig te verander en te verbeter en dit op die beurt, dien weer as aansporing vir ander mense rondom ons.

Een gegewe feit bly staan en dit is dat die toekoms, ons elkeen se toekoms, nog 'n blanko bladsy is wat nog nie geskryf is nie en ons eerstens kan droom van 'n beter more en vandag, nou, daadwerklik werk daarvan kan maak om deur gedagtes, keuses en dade more se droom werklikheid te maak.

So, wat is JOU droom vir MORE en is jy NOU en VANDAG besig om jou droom van more, die toekoms, werklikheid te maak of is jy besig om niks te doen nie, toe te laat dat die verlede jou hede en dus ook toekoms oorskadu en oorheers?

Verhoudings Kategorie