Wat min vrouens in 'n giftige verhouding besef is dat hulle kinders eintlik die werklike slagoffers is nie net van die pa se kant nie, maar ook van hulself, die ma se kant.

'n Vrou wat kinders kan hê is reeds 'n volwassene, 'n mens in eie reg wat haar eie keuses en besluite kan maak en as SY verkies om 'n slagoffer en martelaar te wees kan mens niks daaraan doen nie, maar wat sy vergeet, is dat SY OOK verantwoordelik is daarvoor om keuses en besluite ter wille van HAAR KINDERS te maak en deur in sodanige verhouding te bly, SY SELF verantwoordelik is daarvoor dat haar EIE kinders se lewe en toekoms opgeneuk word deur fisiese en/of sielkundige mishandeling sonder dat HULLE enige keuse het want MA het namens hulle die vonnis op hulle afgedwing.

Dit is presies wat dit is. Letterlik 'n VONNIS van gif, vernietiging en 'n kanker wat hulle HELE lewe gaan en sal verwoes want dit is SY, die MA wat die mag het om hulle daaruit te red of te dwing met HAAR keuses en besluite.

WAT is en was sulke ma's se "drome" vir haar kinders toe hulle gebore is? Moederliefde? Beskerming teen alles, die beste vir hulle wil he en gee. Hulle grootmaak as goeie, sterk, selfstandige kinders en latere volwassenes? 'n Ma EN pa wat hulle liefhet, wat omgee, wat hulle tyd en alles daaraan wy om die beste uit hulself te haal vir hulle kinders en die beste uit die kinders te haal en vir hulle aan te bied?

En wat het daarvan geword? In plaas van bogemelde 'n lewe van hel. Fisiese en/of emosionele mishandeling? Moederliefde en beskerming teen alles het by die deur uitgevlieg. In plaas van vir hulle die beste gee, 'n ma en pa wat omgee, word hulle die slegste gegee, 'n pa vir wie alles net om HOMSELF draai, 'n ma wat self 'n slagoffer is en bloot van dag tot dag probeer oorlewe en haar kinders blootstel aan gevloek, dronkenskap, dwelmmisbruik, woede, aggressie, hongerte, swaarkry en lyding.

Al die fases in kinders se grootword proses is gebasseer op hulle ouers maar dit alles word opgeneuk en opgevoeter en hulle word self groot as wanaangepaste en sosiale verworpenes en DIT weer op HULLE kinders gaan oordra want die Bybel se die sondes van die vaders word besoek aan die kinders tot in die derde en vierde geslag van die wat my haat.

Die eerste jaar is die bondingstydperk vir enige baba maar met 'n liefdelose pa, ma wat selfs nie eens weet of sy kom en gaan nie en familie wat wel omgee maar weens die OUERS se GIF weggestoot word, word dit opgeneuk en is daardie bondingstydperk vir EWIG verlore en het daardie kind reeds na sy eerste jaar daardie met ander mense "bond" agterstand bo normale kinders wat in 'n liefdevolle en omgee huis grootgeword het.

Dit is die eerste jaar wat die baba laat glo dan dat die wêreld en die mense rondom hom betroubaar is en dit word die eerste BOUBLOK waar hy ook positiewe gevoelens oor homself koester. Die warmte van die ouer-kind verhouding stel die kind in staat om frustrasies en angs te verdra en dit is DIT wat van hom/haar weggeneem word gedurende hierdie tydperk. Vir altyd want die eerste jaar is verby.

Gedurende die 1 - 3 jaar oud fase ontwikkel die kind ‘n verstand en wil van sy eie, en leer hy hoe om dinge vir homself te doen. Die kind wat selfstandigheid ontwikkel leer om meer beheer oor sy lewe uit te oefen en ontwikkel ‘n gevoel van selfvertoue in sy vermoë om keuses te maak maar in 'n giftige verhouding, veral waar 'n psigopaat betrokke is, word juis dit, net soos in die moeder se geval, vernietig en vertrap en mag die kind nie vir homself dink nie, mag die kind nie selfstandigh wees en ontwikkel nie en mag die kind nie beheer oor sy eie lewe uitoefen en sy selfvertroue opbou nie.

Die kind word 'n pion, 'n totale niks sonder enige eie wil of persoonlikheid en word tot in die afgrond in verskree, vertrap, afgebreek en vernietig, met fisiese of emosionele geweld want met'n fisiese hou teen die kop bly die letsels lank, maar met emosionele GEWELD gaan die wonde diep en vat dit bitter lank vir die hart, siel en geestelike wonde om te genees.

Gedurende die 3 - 5 jaar fase is die belangrikste ontwikkelingsfase inisiatief en spruit voort uit ‘n gewillingheid om dinge te probeer en die selfvertoue om kanse te waag. ‘n Kind wat inisiatief ontwikkel kan teen die ouderdom van 4 jaar voel dat die wêreld inherent ‘n goeie plek is. Modellering van volwassenes se gedrag kom voor en die kind wil graag soos sy ouers wees. In plaas van dit en met die vooraafgaande, word inisiatief en die eie ek van 'n kind in 'n giftige verhouding ook afgebreek en vernietig. Leer die kind dat die wereld inherend 'n BOSE in plaas vna goeie plek is en word die kind se selfvertroue soos 'n slang onder die haakskeen vertrap en vermorsel en word die gif wat sy ouers hom voer, ook in die kind se eie lewe sigbaar.

En DIT is dan maar nog net die begin fase so WAT van die RES, die RES van die kind se lewe en toekoms?

Is DIT wat jy vir jou kind beplan het en wil he? Is DIT hoe jy die OUERSKAP, sorg en verantwoordelikheid wat GOD aan jou opgedra het, nakom?

Wat gaan jy eendag sê as God jou vra.

"WAT het jy met die liefde, talente en verantwoordelikheid gemaak wat EK vir JOU gegee het? Het jy MY bo alles geplaas of het jy die perels van jou liefde, talente en verantwoordelikheid vir die varke gegooi om te vertrap en een mens bo MY en jou kinders en alles gestel?"

Verhoudings Kategorie