God en liefde, duiwel en haat, geluk en ongeluk, rykdom en armoede en so aan is van die uiterste dinge weerskante toe wat die grootste rol speel in elkeen van ons se lewe. Dit defineer ons grootliks as mens, die wie en wat ons was, is en sal wees.

Ondanks die feit dat God, geloof, hoop en liefde die grootste mag en krag van alles is, is daar een ding wat God aan ons as mens geskenk het wat magtiger is as selfs God en alles hierbo.

Daardie ware krag en genade is die sleutel tot ALLES en DIT is keuses.

Keuses is die ware krag en genade

Ek weet dit is vir gelowige mense moeilik om te aanvaar dat die mens self, deur sy keuses, "magtiger" as God is maar as iemand deur sy eie keuses in die lewe hemel of hel toe gaan kan (of sal) nie God of die duiwel hom uit die hemel of hel haal nie.

Die tweede ding wat so dikwels misgekyk word is dat die ware krag van keuses NIE in die "keuse" self is nie, maar in die uitoefening daarvan deur die daad.

Die "groot" keuses, soos om God te gehoorsaam en te volg, op sigself beteken niks want die Bybel se die geloof sonder die daad is nutteloos en dit is dus die dag na dag, uur na uur, sekond na sekond "klein" keuses wat ons maak en uitvoer deur die daad wat die mag van God IN ONS ontsluit.

Of jy 'n liefdevolle of haatdraende mens is, ongelukkig of gelukkige mens, gelowig of ongelowig, ryk of arm het niks met God of die duiwel te doen nie en dit is nie hulle KEUSE dat jy so is nie, dit is jou EIE keuse of JY liefde of haat gesaai het deur eers die keuse en toe die uitvoering deur te glimlag, te omhels of af te jak en te klap. Dit is JY wat in beheer is van jou emosies of jy gelukkig is of ongelukkig, dit is JY wat in beheer is van jou finansies en nie God of die duiwel nie.

Daardie keuses is die sleutel en die dade daaragter die werklike draai en oopmaak van die deur om die mag en krag van God in jou lewe te ontsluit.

God is in die mens en werk ook deur die mens en sy almagtige krag is dus ook in JOU opgesluit, maar dit is JY wat besluit om te loop, dit is JY wat een tree, dan nog 'n tree en dan nog een gee terwyl Hy jou lei as jy jou hart ontsluit het vir SY wil en DIT in elke keuse en daad volvoer.

JY is die somtotaal van jou EIE keuses tot nou, hierdie oomblik en kan 'n baie slegte of goeie mens wees maar dit kan binne 'n oogwink, 'n enkele keuse en DAAD verander deur jou lewe vir 'n naaste te gee of 'n lewe te neem want daar staan geskrewe God se genade bly tot die laaste dag, wat dalk vandag kan wees.

Net soos 'n enkele keuse, binne 'n breukdeel van 'n sekond geneem en uitgevoer, ALLES wat jy jou HELE lewe lank gedoen het, kan verander en omkeer, net so kan jy met elke keuse wat jy van nou af vorentoe maak, berge versit as jy die geloof het en dit met daad volvoer. Die almagtige GOD is in jou om jou by te staan en sy WIL deur JOU te laat geskied vir solank as wat JY Hom dit toelaat deur jou keuses en dade volgens sy woord te volvoer.

Die ware krag en genade is in ELKE keuse en daad wat JY maak opgesluit en net soos 'n boom aan sy vrugte geken word, word ook JY aan jou DADE geken en sal eendag daarvolgens geoordeel word.

DIT is dan ook die ongelooflike genade van God, dat ons nie 'n suurlemoenboom is wat net suurlemoene dra nie, maar die KEUSE gebied word om deur ons vrugte en dade geken te word en dit na enigiets te verander met sy hulp en leiding.

Verhoudings Kategorie